Õuruupa Keskpank
Õuruupa Keskpank om Õuruupa Liido institutsioon, miä vastutas rahapoliitiga iist riigen, miä ommaq võtnu tarvitusõlõ ütidse raha õuro (Austria, Belgiä, Eesti, Hispaania, Holland, Iirimaa, Itaalia, Kreeka, Küprüs, Leedu, Luksõmburk, Läti, Malta, Portugal, Prantsusmaa, S'aksamaa, Slovakkia, Sloveeniä ja Soomõ).
Üten noidõ 19 riigi keskpanguga tege Õuruupa Keskpank Õurosüsteemi.
Eesti Panga president esindäs Eestit Õuruupa Keskpanga nõvvokogon, miä määräs, ku korgõq vai madalaq ommaq õurot pruukvin maiõn baasintressimääräq, minka pangaq saavaq keskpangast laina võttaq vai umma rahha keskpangan hoitaq. Baasintressimääräq mõotasõq intressimääru, midä pangaq umilõ kliendele masva raha hoitmisõ iist pangan ni võtvaq umilt kliendelt pangast võetuisi lainu iist.
Õuruupa Keskpank piät intressimääru säädmise ja muiõ rahapoliitiga riistuga hoitma hinnaq õurot pruukvin maiõn kimmäq, niimoodu et hinnaq pall'o kipõst es kasunuq. Õuruupa Keskpanga tsiht om hoitaq inflatsiooni keskpika ao joosul 2 protsendi lähkün.
Õuruupa Keskpank om üts säitsmest Õuruupa Liido institutsioonist.
Õuruupa Keskpank om Frankfurdin S'aksamaal.
| Õuruupa Liido institutsiooniq |
|---|
| Õuruupa Parlament – Õuruupa Ülembkogo – Õuruupa Liido Nõvvokogo – Õuruupa Kommisjon – Õuruupa Liido Kohus – Õuruupa Keskpank – Õuruupa Kontrollikoda |