Õuruupa Kontrollikoda
Õuruupa Kontrollikoda kontroll Õuruupa Liido raha pruukmist. Kontrollõ tulõmusõq esitedäs aastagaruandin Õuruupa Parlamendilõ, kiä või eelarvõ täütmise tuuperrä hääst kittäq vai hääst kitmäldäq jättäq. Õuruupa Kontrollikoda om üts säitsmest Õuruupa Liido institutsioonist.
Õuruupa Kontrollikoda om Luxembourgin.
Õuruupa Kontrollikua tüüd juht kolleegium, kohe kuulus õgast Õuruupa Liido riigist üts liigõq. Õuruupa Kontrollikua liikmõq nimetäs kuvvõst aastagast ammõtihe Õuruupa Liido Nõvvokogo, kon õka Õuruupa Liido riiki esindäs ministri.
2004.–2016. aastagal oll' Eestist nimetedü Õuruupa Kontrollikua liigõq Kaljulaiu Kersti. Päält tuud, ku Riigikogo oll' Kaljulaiu Kersti presidendist valinu, pakk' Eesti valitsus 2016. aastaga rehekuu 10. pääväl Õuruupa Kontrollikua vahtsõ liikmõ kandidaadist Pardsi Juhani, kiä oll' ammõtin aastagil 2017–2022. Parla esindäs Eestit Õuruupa Kontrollikuan Pentus-Rosimannusõ Keit.
| Õuruupa Liido institutsiooniq |
|---|
| Õuruupa Parlament – Õuruupa Ülembkogo – Õuruupa Liido Nõvvokogo – Õuruupa Kommisjon – Õuruupa Liido Kohus – Õuruupa Keskpank – Õuruupa Kontrollikoda |