Soomõ hummogumurdõq

Soomõ hummogumurdõq (soomõ keelen itämurteet) ommaq murdõq, midä kõnõldas Hummogu-Soomõn.

Hummogumurdis peetäs kattõ suurõmbat murdõrühmä:

Savo murdõq (savolaismurteet)
Lõunõhummogumurdõq (kaakkoismurteet)

Hummogumurdit, pääas'aligult lõunõhummogumurdit, kõnõldi ka Kar'ala maakaala pääl. Sõa aol kahandõdiq inemiseq ärq ja nuuq inemiseq eläseq noq ümbre Soomõ, pall'oq ommaq jo uma murdõ ärq unõhtanuq. Soomõ hummogumurdis loetas ka ingerläisi kiilt.

Soomõ hummogumurdõq ommaq üts' katõst soomõ keele päämidsest murdõrühmäst. Tõsõs suurõmbas murdõrühmäs om õdagumurdõq.

Tunnussõq

Soomõ keelen om hää võrrõldaq, kuimuudu määnegi sõna käänüs kiräkeelen ja kuimuudu määndsengi murdõn.

T nõrk astõq

Vana õdagumeresoomõ astmõvaeldus om olnuq t : ð, näütüses pata:paðan. Võro keelen ommaq n ja ð vaihõlt ärq kaonu ni käänätäs pada : paa.

Ka soomõ hummogumurdin või ollaq tuu d är kaonuq, a sääl või ollaq ka midägi muud: j, v vai h.

Näütüses ku soomõ kiräkeelen om sota : sodan, sis Kar'ala maakaalalt peri inemine või üldäq ka sota : sovan.

Kiräkeele ts

Soomõ kiräkeele ts om hummogumurdin ht.

Kiräkiil: metsä 'mõts', Savo: mehtä.

Pehmendüs

Ku võro keelen saa kõiki helle pehmendäq (näütüses kuimuudu üteldäs pluss' võro keelen ja pluss eesti keelen), sis soomõ keelen inämbäste pehmendüisi ei olõq. Ommaq õnnõq mõnõq kotusõq, kon om pehmendüst kuuldaq ja nuuq ommaq hummogumurdõ ala pääl. Säänest pehmendüst märgitäs soomõ keelen j-tähega, miä või essütäq võro- vai eestikiilset inemist.

Näütüses om Kallavesi, miä om üts' suurõmbit Soomõ järvi, seokandi kõnõpruugin kallavesj.

Miiq, tiiq, nimäq

Õdagumeresoomõ keelin om esiqsugutsit tegosõnakäänüselõppõ ja asõsõnno. Mõnõn mõttõn ommaq naaq üttemuudu, tõsõn mõttõn andvaq märko, kost kõnõlõja või peri ollaq.

Ku suumlanõ ütles myö 'miiq', työ 'tiiq' ja hyö 'nimäq', om tä kindlalõ hummogumurdõ alalt peri. Vanaq Laadoga algkeele asõsõnaq ommaq külh laembalt levinüq, a Soomõ piire seen ommaq nuuq küländ hääq märgiq.

Kiildsõna

Ku võro keelen saat keeldäq kattõ muudu: ärq minguq! vai minku-uiq!, sis soomõ keelen om kiildmine rohkõmb eesti keele muudu: älä mene!

Ku suumlanõ ütles elä mäne!, om tä määndsegi hummogumurdõ kõnõlõja.