Salatsi jõgi

Salatsi jõgi

Salatsi jõgi (läti keelen Salaca, saksa keelen Salis) om jõgi Lätin. Tä nakkas pääle Asti järvest (ka Burtnieki järv, läti keelen Burtnieks, Burtnieka ezers, Burtnieku ezers) ja suubus Salatsi (läti keelen Salacgrīva, liivi keelen Salats) liina man Liivi lahtõ.

Salatsi jõõ pikkus om 95 km ni jõgikund om 3421 km², minkast 3239 om Lätin. Ülejäänüq jõgikund om Eestin. Jõõ sadõminõ om 42 m ni vooluhulk 31,3 m³/s. Hääpoolidsõq harojõõq om Ramata (30 km), Glāžupe (18 km) ni Melnupe jõgi (14 km). Kur'apoolidsõq harojõõq om Ķirele (14 km), Nātrene (13 km), Īģe (49 km), Spaļupe (9 km), Jogla (31 km), Noriņa (11 km) ni Korģe (33 km).

Suurõmbaq kotussõq Salatsi jõõ veeren ommaq Salatsi (läti keelen Salacgrīva, liivi keelen Salats), Väikene Salatsi (läti keelen Mazsalaca, liivi keelen Piški Salats), Vana-Salatsi (läti keelen Vecsalaca), Vīķi, Vecate, Skaņkalne, Staicele, Rozēni ja Mērnieki.

Salatsi jõgi oll' innembi suurõmba jao aastast laivatav. Põhilidsõlt tarvitõdiq tedä mõtsaveos. Salatsi sadaman lasti kaup merelaivulõ ümbre. Salatsi jõõ suus oll' joba 5.–6. aastagasaal satam ja liivlaisi liin Salatse. 19. aastagasaa lõpun tetti vahtsõnõ satam ni muuliq tuu kaitsõs.