Sõrmus (priinimi)
Sõrmus om priinimi.
Seod nimme kand Eestin 2022. aastaga 288 inemist. 16 kandjat om ka nimel Sermus, miä oll’ inne õ-tähe pruukmistõ võtmist üts võimalus, kuis sõnna sõrmus kirotõdi.
Aolugu
[toimõndaq | toimõndaq lätteteksti]Mõisit, kon seo selge tähendüsegaq nimi panti, oll’ kokko 19, noist Liivimaa kubõrmangun 15 ja Eestimaa kubõrmangun 4. Lisas es jõvvaq üten mõisan, Vahtsõliinan, nimi ei hingelugõmistõ egaq personaalraamatudõ, a Räpinä mõisarahva hulka om XIX aastasaa kesken tulnuq Vahtsõliina Väikutaudsa Mihkli poig Jakob Sörmus, vällätiinnüq soldat. Sõrmus võisõ ollaq timä niinimetet soldatinimi.
Mulgimaal panti seod nimme kuvvõn paigan: Taageperä, Penuja, Karksi, Polli, Tuhalaane ja Morna mõisan. Taageperä nimme kirotõdi hingelugõmisõn Sermus ja registrin Sormus. Ka keriklik kiräpilt Sermus om päämiselt säält lakja levinüq.
Viil panti seo nimi Põh’a-Pärnomaa Kõima ja Parasmaa mõisan. Tartomaa kotussõq olliq Alatskivi (hingelugõmisõn Sermus), Valguta Rannu kihlkunnan ja Jaamamõisa Tarto lähkün. Saarõmaal oll’ kats kotust: Sääre mõisa Sõrvõn ja Piila mõisa Kaarman.
Põh’a-Eestin panti Sörmus Aadma mõisan ja Suuremõisan Hiiomaal ni Murasten Keilan ja Ohekatku mõisan Rapla kihlkunnan.
Võrumaa üts kotus om Sõristõ mõisa Kanepin. Sääl saivaq seo nime joba 1809 Sarapuu Jaani kats poiga Taavet (Dawid) ja Hindrik. Nimi läts’ säält lakja Erästviirde ja ka Põlva poolõ.
Tõnõ suguvõsa tulõ Saru mõisast Harglõst, kon Linnarti Jaani kolm poiga katõst abielost ja pojatütreq veiq seo nime lakja ka Rõugõ kihlkunna poolõ (Tsooru, Nursi, Vana-Laitsna). Hingelugõmisõn 1826 om näide priinimi kirotõt viaga Söimus, a 1834 arvusaadavambalt: Sermus.
Sõnast ’sõrmus’ saad nimi om küländ levinü ka Vinnemaal, kon Kol’tsov (Кольцов) kuulus peris harilikõ nimmi hulka. Läti sama tähendüsega nimi Gredzens olõ-õiq nii harilik, a om iks olõman ja ka Eesti poolõ pääle levinü.
1921. aastal Petserimaal võeti perekunnanimme Sõrmus viiel kõrral: Lobotka, Petseri ja Pankjavitsa vallan.
Eestistämisel võtiq vahtsõq nimeq Sõrmus Koltov ja Koltsov Petserimaal ni Timbermann Karksin. Sama tekk’ Gredson Pärnon, timä vana nimi tulõtas veidükese miilde läti sõnna. Üts Sõrmus ka vahet' nimme, võttõn asõmalõ Saaring.
Lätteq
[toimõndaq | toimõndaq lätteteksti]Saarõ Evar: Priinime lugu: Sõrmus. Uma Leht 524, 20.10.2022. Pruugit 20.10.2022.