Pantalon

Pantalon om priinimi.

Seol priinimel om Eestin 30 kandjat.

Aolugu

Nimi panti Vana-Antsla mõisan, saajaq elliq Kiisa, Laksi, Härmä ja Suurõsõõru-Hinni talon. Varahampa, 1811, olliq elokotussõq Härmä ja Suurõsõõru-Hinni, viil varatsõmbist hingelugõmiisist tulõ vällä, et tegemist oll’ Hinni Jüri ja Hinni Mihkli poigõga. Sama suguvõsa liikmõs oll’ ka üts sant Mihkli, Reinu poig, a timä sai Pantaloni priinime pääle surma, selle et kuuli 1818.

Pantaloni nime algkodo Suurõsõõru-Hinni om seo poolõst märkmist väärt, et sama priinimi püssü sääl talon vähämbält 20. aastasaa lõpuni.

Nime alossõs võissi olla pühämehenimi, miä Õdagu-Õuruupa ja ka s'aksa traditsioonin om Pantaleon. Eestin tundas kreeka nimekujost saadut nimme Panteleimon, minkalõ vastas ka vinne keele Пантелеимон. Kreekakeeline nimi tähendäs ’kõiki vasta halõstaja; armulinõ’, a ülekantun tähendüsen ka ’kõiki arstja’. Nime tuntus tegijä Pühä Panteleimon elli 3. aastasaal Nikomedian (parhilla Türgü) ja oll’ kuulsa tohtri, kedä peeti immetegijäs. Võhlust täüs kolleegiq kaibsivaq timä pääle Rooma keisrile, et tä om kristlanõ. Umast usost vallalõ tä es ütleq, ka piinamise pääle. Esikiq timä hukkaminõ es lääq kõrda inne ku Panteleimon oll’ esi pallõlnuq hukkajidõ iist ja hinnäst näide meelevalda andnuq.

Tõnõ, vähämb usutav võimalus om, et Vanan-Antslan anti priinimes Itaalia commedia dell’arte tegeläse Pantaloone nimi. 16. aastagasaa tegeläskujo tüübis om Veneetsiä vanamiis, tsussõrdaja, kidsi, a sõski moodunarr (kitsaq kaadsaq, midä naati kutsma "pantalooniq"). Ka timä nime alossõs om kõgõ usutavambalt Panteleimoni pühämehenimi.