Keskvõrrõq
Keskvõrrõq vai komparatiiv om umahussõna vai määrsõna võrdõlusastõq. Keskvõrrõq näütäs, et minkalgi om midägi rohkõmb vai veidemb kuq tõõsõl.
- Sannalisõq nõudsõq sannamehe käest kõvõmbat lõunõt. Tan lausõn om sõna kõva keskvõrdõ osakäänüssen.
- Kaeq, saq olõt paksõmbas lännüq! Tan lausõn om sõna paks keskvõrdõ saajakäänüssen.
Mõnikõrd om umahussõna keskvõrdõst saanuq ka umaette pruukmisõn sõna:
- Parõmb um puuľ munna ku tühi kuuŕ.
- Üts' vanõmb naanõ sais' mul iin.
Umahussõnno võrdõlusastmõq ommaq ka algvõrrõq ni ülivõrrõq.
Keskvõrrõq võro keelen
[toimõndaq | toimõndaq lätteteksti]Kõgõ hariligumb keskvõrdõ tunnus võro keelen om -mb, miä liitüs umahussõna vai määrsõna umakäänüssele.
Om ka kotussit, kom keskvõrdõ tunnussõs om midägi muud. Näütüses hummogupoolidsõmb Võromaa vai Setomaa, kon keskvõrdõ tunnussõs om -p: vanõp miis.
| Algvõrrõq | Keskvõrrõq | Keskvõrdõ umakäänüs | Keskvõrdõ osakäänüs |
|---|---|---|---|
| lämmi | lämmämb | lämmämbä | lämmämbät / lämmämpä |
| vahtsõnõ | vahtsõmb | vahtsõmba | vahtsõmbat / vahtsõmpa |
| Algvõrrõq | Keskvõrrõq | Keskvõrdõ umakäänüs | Keskvõrdõ osakäänüs |
|---|---|---|---|
| lämmiq | lämmimbäq | lämmämbide / lämmämpi | lämmämbit / lämmämpi |
| vahtsõq | vahtsõmbaq | vahtsõmbidõ | vahtsõmbit / vahtsõmpi |
Om ka sõnno, kon umakäänüssen inne -mb tunnust midägi muutus. Inämbjaolt ommaq njooq katõtsilbilidseq a- / ä- vai u- / ü-tüvega sanaq. Sinnäq tulõ e / õ asõmalõ.
| Algvõrrõq | Keskvõrrõq | Keskvõrdõ umakäänüs | Keskvõrdõ osakäänüs |
|---|---|---|---|
| pikk' | pikemb | pikembä | pikembät |
| paks | paksõmb | paksõmba | paksõmbat / paksõmpa |
Perränõudminõ
[toimõndaq | toimõndaq lätteteksti]Keskvõrrõq nõud võro keelen ka tegemisalodsõ vai sihitise muutmist. Võro keelen saa taad tetäq kattõ muudu.
- Saq olõt must pikemb.
- Saq olõt pikemb minno.
Keskvõrdõ aolugu
[toimõndaq | toimõndaq lätteteksti]Varahadsõn õdagumeresoomõ algkeelen ol'l' keskvõrdõ tunnussõs *-mpa, *-mpä. Nimekäänüssen muutuq a ni ä > i. Tast lõpust om täämbädses pääväs i ärq kaonuq, aq taad võit viil nätäq näütüses soomõ keelen.
Keskvõrrõ tõisin keelin
[toimõndaq | toimõndaq lätteteksti]Soomõ keelen om pal'l'o vanna alalõ, nii om ka i sõna lõpun olõman.
| Kiil' | Algvõrrõq | Keskvõrrõq |
|---|---|---|
| Võro | suur' | suurõmb |
| Seto | suur' | suurõp |
| Eesti | suur | suurem |
| Soomõ | suuri | suurempi |
| Vad'a | suur | suurõp(i) |
| Vienakar'ala | šuuri | šuurempi |
| Vepsä | sur' | suremb |
| Ungari | nagy | nagyobb |