Toborna pettäi
Toborna pettäi (ka Toborna petäi) om kaitsõalonõ petäi ja pühäpuu Võromaal Noodaskülan Rõugõ kihlkunnan.
Toborna pettäi kasus Kütioro hummogupoolsõl pervel Tobornamäe pääl ja korgõs üle Võro-Loosi maantii (Holopi-Hellekunnu kõrvalmaantii 25127).
Puu om aoga kaotanu suuri ossi ja ladõv om ära häönenüq, õnnõ jälje omma järele jäänu. Järelejäänu ossa omma kõvasti ümbrekunna mõjol ümbre kujonenu. Umal aol kasus pettäi lagõda nurmõmaa pääl, sirotõli tuule puhutu ossa tii pääle nii ku vihmavari, a ku oroperv jäi puustusõs ja võsa pääle tull, kuiose külgmädse ossa är ja puu nakas keskest püramämiitjalt valgõ poolõ nõsõma. Rohilidsõlt hallõtama om jäänu õnnõ üts alõmano jämme oss, puu vanõmb osa om perädü suurõ kannu moodu – ümbremõõt 2,82 miitret.[1]
Puu igä olõ-õi viil tiidüslidsõlt kimmähe paika pant.[2]
Toborna pettäi om luudukaitsõ all, Keskkonnaregistri numbriga KLO4001149.[3]
Rahvaperimüse perrä om pettäi viimäne pühämõtsä puudesalgust jäänü puu, kohe om annõt toodu. Niisama om rahvajuttin puu alaq är käkit Vahtsõliina lossi kulla-aarõ, minka Roodsi sõavägi vinläste iist pakku joosten maha jätt. Kulda tule otsi säitsme soldatisinneli kavvõhuselt, tuultsamalt tsihilt, kohe puu esiqerälidsel täüskuu üül oma varjo heit.[2]
Lätteq
[toimõndaq | toimõndaq lätteteksti]- ↑ Keskkonnaministri määruse „Võru maakonna kaitstavate looduse üksikobjektide piiranguvööndi ulatus” seletuskirja Lisa 4 kaudu Keskkonnaregistri alusel (lk 22) https://infoleht.keskkonnainfo.ee/GetFile.aspx?id=-848886500
- ↑ 2,0 2,1 Toborna pettäi kõrval saisva teedüstahvli perrä.
- ↑ https://register.keskkonnaportaal.ee/register/protected-nature-object/7372733