Türnpu Anne

Anne Türnpu lugõmah jutust Sommeri Lauri kokko pant raamadu "Ilmaveere jutud" kaejatsil Taliinah 2023. aastaga urbõkuul.

Türnpu Anne (sündünüq 25 urbõkuud 1963 Tarton) om näütelejä ja lavastaja.

Türnpu Anne edevanõmbaq ommaq peri Hiiomaalt.

Türnu Anne om lõpõtanuq Nõo keskkooli matõmaatiga eriklassi 1981. aastagal ja opnuq matõmaatikat 1981.–1982. aastagal Tarto Ülikoolin. Päält tuud oppõ tä Taliina Riikligu Konsõrvatooriumi lavakunstikoolin, mink lõpõt' 1986. aastagal.

Tihtsähe om tä pruuknu uma tiatritüün rahvalaula ja -juttõ. Tarto Latsitiatrin om tä lavastanuq 1999. aastagal tükü "Kass kudi kangast, peni puhkse pilli..." ja samate 1999. aastagal tennüq seto laula perrä tiatritükü "Kalmunäio". Üten Jõepera Marioniga om Anne Türnpu lavastanuq 2012. aastagal Setomaal Obinitsan Taarka Perimüstiatrin tükü "Kuis müvväq setot" ni 2013. aastagal lavastanuq sama tiatri tükü "Leelo ots setot".