Rahvakunstiselts' Leigariq

Rahvakunstiselts’ Leigariq om Talliinan ja Tarton teküs tandsu- ja muusigaütisüs. Leigariq hindasõq ja edendäseq päämidselt Eesti perimüst, aq tandsvaq lavatandsu kah. Leigariil om üle 200 liikmõ.

Aolugu

Leigariq ommaq luuduq urbõkuu 14. pääväl 1969. aastagal, et Eesti vabaõhomuusõumi küläliisile perimüstandsu ja muusikat näüdädäq. Edimäne muusõumietteastminõ tetti hainakuu 26. pääväl 1969. aastagal. Päält tuud ommaq Leigariq vabaõhomuusõumin ette astnuq egäl suvõl puulpäivilde ni pühäpäivilde kell 11. Toonaq toimõnd’ selts’ ilma nimeldäq, nimi Leigariq võeti umas 1971. aastagal. Seldsi edimäne kunstilinõ juht oll’ rahvaperändüseuurija Torobi Kristjan.

1985. aastagal sai Leigariil täüs 1000 etteastmist. Samal aastagal sai Leigariidõ vahtsõs juhis Järvelä Kalev. Perän Eesti hindäperi saamist sai Leigariist MTÜ Rahvakunstiselts’ Leigariq. 1993. aastagal naksiq Leigariq ette astma vabaõhomuusõumin ka jaaniõdagidõ, miä om parhilla saanuq joba kombõs. 80. ja 90. aastil käüti ka pall’o vällämaal ette astman, näutüses Soomõn, Roodsin, S'aksamaal, a ka Ameeriga Ütisriigen ja Jaapanin.

2008. aastagal tull’ vällä Torobi Kristjani eestikiilne „Viron vakka“ üten DVD-gaq. 2014. aastagal sai kunstilidsõs juhis Kapper-Tiisleri Sille, kiä om taan ammõtin täämbädse pääväni. 2010. aastil sai päält perimuse opmisõ tähtsäs viil taa oppaminõ, näütüses festivalil Sabatants.

2024. aastagal tähüstiq Leigariq umma 55. sünnüpäivä. Parhillaq ommaq Leigariq ette astnuq üle 5000 kõrra.

Leigariidõ tandsu- ja lauluvara

Leigariidõ varan ommaq Eesti tandsuq 19. aastagasaast. Kõgõ vanõmbaq ommaq takan tegeväq tandsoq (mustlanõ, kiidsak, pulgatands). Vahtsõmbist ommaq varan kontratandsuq (kaarajaaniq, ingliskaq, kadrilliq, kalamiis jt.) ja rühmätandsuq (kolonn’tands, räditands), ka paaritandsuq. Päält tandsu ommaq Leigariidõ varan tsõõri- ja muuq mängoq. Muusõumikavan ommaq ka tähtsäq vahtsõmbaq ja vanõmbaq rahvalauluq.

Viron vakka

„Viron vakka“ om Torobi Kristjani raamat, miä seletäs põh’aligult 105 Eesti tandsu. Seo tull’ vällä 2008. aastagal. Üten raamadugaq tull’ vällä kaq samanimeline DVD. DVD kokkopandmist juhtõ Järvelä Kalev ja Kapper-Tiisleri Sille.