Jakusõda
Jakusõda (soomõ keelen jatkosota) oll' sõda Soomõ ja Nõvvokogoliido vaihõl 25. piimäkuu pääväst 1941 kooniq 19. süküskuu pääväniq 1944.
Mõnikõrd om jakusõta peet Talvõsõa jakus. Vinnemaa ja Nõvvokogoliido kirändüsen kõnõldas Jakusõast päämädselt ku suurõ esämääsõa soomõ väerõnnast.
Jakusõda naas' pääle 15 kuud päält Talvõsõta. Sõaplaani peiq suumlasõq s'akslaisiga kuun. Soomõl oll' sõas mitmit põhjusi, näütüses suuv Talvõsõan kaotõtuq maaq tagasi võttaq ja mõtõq Suurõst Soomõst.
22. piimäkuu pääväl alost' S'aksamaa opõratsiooniga Barbarossa ja rünnäs' Nõvvokogoliito. Kolm päivä ildampa, 25. piimäkuu pääväl, naas' Nõvvokogoliido linnuvägi Soomõ liino, tõisi siähn ka Helsingit, pommitama, mink pääle Soomõ Eduskund tunnist', et Soomõ on sõan.
1941. aastaga lõpus oll' Soomõ käen suur osa Kar'alast kooniq Süväri jõõniq. 1944. suvõs võtiq vindläseq suurõ osa naist maiõst tagasi. Tõõnõtõõsõ tapminõ lõppi 5. süküskuu pääväl 1944, ku naas' pääle vaheqrahu, ammõtlik Moskva vaheqrahu tetti 19. süküskuu pääväl 1944.
Sõan kuuli 63 200 suumlaist[1], 23 200 s'akslaist[2] ja päält 250 000 vindläse[3], ku rehkendäq õnnõ sõaväeläisi.
Lätteq
[toimõndaq | toimõndaq lätteteksti]- ↑ Kinnunen, Tiina; Kivimäki, Ville 2011. Finland in World War II: History, Memory, Interpretations. BRILL. ISBN 978-9004208940. lk 172.
- ↑ Nenye, Vesa; Munter, Peter; Wirtanen, Toni; Birks, Chris 2016. Finland at War: The Continuation and Lapland Wars 1941–45. Osprey Publishing. ISBN 978-1472815262. lk 320.
- ↑ Kinnunen, Tiina; Kivimäki, Ville 2011. Finland in World War II: History, Memory, Interpretations. BRILL. ISBN 978-9004208940. lk 172.