Heina Karl Jakob
| Heina Karl Jakob
Karl Jakob Hein | |
|---|---|
_6.jpg) | |
| Sündünüq | 13. mahlakuu päiv 2002 Põlva |
| Rahvus | eestläne |
| Ammõt | jalgpallimängjä |
| Pikkus | 193 |
Heina Karl Jakob (sündünüq 13. mahlakuu pääväl 2002 Põlvan) om eesti jalgpallimängjä (värtevaht), kiä mäng S'aksamaa kõgõ korõmba liiga klubin Breemeni Werder.
Karjäär
[toimõndaq | toimõndaq lätteteksti]Klubiq
[toimõndaq | toimõndaq lätteteksti]Eesti klubiq
[toimõndaq | toimõndaq lätteteksti]Põlva liinan sündünüq Hein naas' jalgpalli mängmä jalgpalliklubin Loo, ku oll' katõsa aastakka vana. 2015. aastaga läts' tä kuulsa värtevahi Poomi Mardi jalgpalliakadeemiähe FC Nõmme United ja 2018. aastaga, ku Hein oll' õnnõ viistõisku, võeti tä joq miihi võistkunda. Sama aastaga suvõl käve tä mitmõn Inglüsmaa korõmba liiga klubin – Arsenalin, Brightonin, Hove Albionin ja Manchester Unitedin.[1]
Arsenal
[toimõndaq | toimõndaq lätteteksti]2018/19 huuaos läts' Hein Arsenali nuuriakadeemiähe. 2019. aastaga lehekuun tegi tä Arsenaliga prohvilepüngi nika ku 2022. aastaganiq. 2020/21 huuaig oll' Hein Arsenali neläs värtevaht päält Leno Berndi, Rúnarssoni Alexi ja Macey'i Matti. Mängiq saiõ Hein U23 võistkunna iist.
Lain Readinguhe
[toimõndaq | toimõndaq lätteteksti]2022. aastaga lainas' Arsenal Heina vällä tugõvusõ poolõst tõistõ liigahtõ, Readingu võistkunda[2]. Hein saiõ mängiq õnnõ viis mängu, täl läts' sõrm katski ja lainulepüng lõpõtõdi.
Lain Valladolidi Reali
[toimõndaq | toimõndaq lätteteksti]2024/25 huuaos lainas' Arsenal Heina vällä Hispaania kõgõ korõmbahe liigahtõ Valladolidi Real[3]. Tä oll' sääl nummõr üts, ja mänge 31 mängu.
Breemeni Werder
[toimõndaq | toimõndaq lätteteksti]2025. aastaga põimukuun lainas' Arsenal Heina vällä S'aksamaa kõgõ korõmba liiga kluppi Breemeni Werder[4]. Päätriinjä ütel' huuao aolustusõn, et Hein om nummõr kats, a sis saiõ Werderi uma miis vika ja Heinalõ anti võimalus mängiq. 26. süküskuu pääväl mänge Hein suurõ Müncheni Beyerni vasta ja kuiki näq kaodiq 0:4, sis Hein saiõ kõvva kittäq[5]. A ku tõõnõ värtevaht, Mio Backhaus terves saiõ, panti Hein jälq pingi pääle nika ku huuao lõpuniq. Talvõl taheti Heina mitmõlt puul lainus, a Werder lupa-as eestläst minemä[6].
Päält 2025/26 huuaigu möi Werder tõõsõ värtevahi maaha ja ost' Heina Arsenalist peris mängjäs[7].
Eesti jalgpallikogondus
[toimõndaq | toimõndaq lätteteksti]Heina edimäne mäng Eesti miihi jalgpallikogondusõ iist oll' Gruusia vasta 2020. aastaga süküskuun[8]. Jalgpallivõroväreht Soccernet nimmas' Heina õkva miiskunna kõgõ parõmbas[9]. 2026. aastaga 30. süküskuu päävä saisugaq om Hein Eesti jalgpallikogondusõn mängnüq 49 mängu ja 12-n mängun olõ-õiq tälle üttegiq palli sälä taadõ lüüd[10]. Tuu ao seen om tä vasta lüüd 10 penaltit, minkast õnnõ viis ommaq sisse lännü.
Lätteq
[toimõndaq | toimõndaq lätteteksti]- ↑ Riesi Steffen: Karl Hein: Eesti nuur värtevaht käü uma mentori Poomi Mardi jälgi piten. 3. joulukuu päiv 2019. Pruugit 29. süküskuu pääväl 2026. (s'aksa keelen)
- ↑ Karl Hein läts' Readinguhe lainulõ. 24. vahtsõaastakuu päiv 2022. Pruugit 30. süküskuu pääväl 2026. (inglüse keelen)
- ↑ Karl Hein läts' Valladolidi Reali lainulõ. 13. põimukuu päiv 2024. Pruugit 30. süküskuu pääväl 2026. (inglüse keelen)
- ↑ Heina Karl Jakob läts' vahtsõs huuaos nelläkõrdsõ S'aksamaa meistri manoq. 22. põimukuu päiv 2025. Pruugit 30. süküskuu pääväl 2026. (eesti keelen)
- ↑ Karl Hein Breemeni Werderist näüdäs' hääd mängu. 27. süküskuu päiv 2025. Pruugit 30. süküskuu pääväl 2026. (s'aksa keelen)
- ↑ Werderi värtevahtõ triinjä: Heina taheti mitmõlt puult, a timmä piäsiq klubin hoitma. 26. radokuu päiv 2026. Pruugit 30. süküskuu pääväl 2026. (eesti keelen)
- ↑ Backhaus lätt ärq, Heinast saa nummõr üts. 22. lehekuu päiv 2026. Pruugit 30. süküskuu pääväl 2026. (inglüse keelen)
- ↑ Süvari Aet: Edimädse mängu mängnüq Heina Karl Jahob: kõvva väeldimiq! 5. süküskuu päiv 2020. Pruugit 30. süküskuu pääväl 2026. (eesti keelen)
- ↑ Kõgõ parõmb mängjä Gruusia vasta oll' Karl Jakob Hein. 6. süküskuu päiv 2020. Pruugit 30. süküskuu pääväl 2026. (eesti keelen)
- ↑ Heina Karl Jahob. jalgpall.ee. Pruugit 30. süküskuu pääväl 2026. (eesti keelen)