Gaasitehäs
Võro Gaasianalüsaatridõ Tehäs (VGT), rahva siän tunnõt ku Gaasitehäs, oll' aparaaditehäs Võro liinan, Kreutzwaldi huulitsan, pia Tamula järve perve pääl.
Tehässe aolugu[toimõndaq | toimõndaq lätteteksti]
Ettevõtõq luudi 1959. aastagal. Tehässe pääkorpus sai valmis 1962. aastagal. Tuu om täämbätseni üts Võro liina tunnõtumpi ehitüisi. Gaasitehässe vanõmb osa, verevist savikivest ja pikä verevä savikivikorsnaga hoonõq, miä jääs päämajast liina poolõ, oll' tsaariaignõ piiretüsevabrik.
Nõvvokogo aol oll' ettevõttõ täüspikk eestikiilne nimi Arnold Veimeri nimeline Võru Gaasianalüsaatorite Tehas.
Gaasitehäs lõpõt' uma tüü 2010. aastagal.
Midä tehässen tetti[toimõndaq | toimõndaq lätteteksti]
Päält gaasianalüsaatridõ tetti tehässen ka tõisi aparaatõ, minkast suur osa lätsiq riigist vällä niinimitedüihe sõbralikkõhe sotsialismimaihtõ, näütüses Vietnamihe jms. Tehässen tetti ka lajatarbõkaupa, näütüses köögiväitsi, puuviläkorjamisõ abiriisto ja rulasit.
Täämbäne päiv[toimõndaq | toimõndaq lätteteksti]
Parhilla tüütäs inneskidse Gaasitehässe ruumõn mitu vähämbät ettevõtõt ni suurõmb osa tehässest om ümbre ehitet järvekaehusõga kortinis.