Donneri David
| Donneri David
David Donner | |
|---|---|
| Sündünüq | 23. joulukuu päiv 1810 Vahtsõ-Kuustõ mõisa |
| Koolnuq | 24. joulukuu päiv 1883 Võnnu |
| Ammõt | kuulmeistre |
Donneri David (David Donner, 1810-1883) oll' kuulmeistre ja kultuuritegeläne Põlva kihlkunnan.
Elokäük
[toimõndaq | toimõndaq lätteteksti]Donneri David sündü 23. joulukuu pääväl 1810 Vahtsõ-Kuustõ mõisan. Timä esä Perkune Janka oll' sääl mõisan aidamiis. Janka (Janis) oll' lätläne ja käünüq Läti koolin. Vahtsõ-Kuustõhõ sattu tä tuuperäst, et mõisnik (de Villebois) taht' niimuudu. Perkune Janka võtt' 1809 naasõs Kangro Tuuma tütre Anna Vahtsõ-Kuustõst. David oll' näide kõgõ vanõmb poig, täl olliq viil veleq Carl (1812), Reinhold (1815) ja Peter (1820). Perkune Janka kuuli 1821. a. Luutvinan, ku oll' kõgõs 44-aastaganõ. David oll' toona 11-aastaganõ. Kas sugulaisi vai mõisaherrä tahtmisõ perrä saadõtivaq poisiq Lätimaalõ, kon nääq saiq kooliharidusõ, arvada et Aluliinan (Marienburgin).
1831. a. tulliq Perkune Janka pujaq Eestimaalõ tagasi nink Carl ja David lätsiq elämä Põlva kihlkunda. 1832 käve David leerin ja võtt' naasõs Schultzi Louisa. Tuu oll' perit Lätist Zeltini mõisast ja sündünüq 1808.
1833 tetti Mamasõn Köstremäel tüütänüst köstrekoolist Põlva kihlkunnakuul ja Davidist sai tollõ edimäne kuulmeistre. Tä opas' sääl aastagil 1833-1863. Üteliidsi sai täst Põlva kerko edimäne hõrilamängjä. Tä lõi ka edimädse Põlva tütärlatsikooli aastagal 1857.
Donneri David oll' tuu, kiä tull' mõttõ pääle naataq Põlva laulupita kõrraldama. Timä oll' ka edimäidsi pita kõrraldaja.
David kuuli 24. joulukuu pääväl 1883 Võnnun köstremajan, tä oll' sõs 73 aastakka vana.
Kaeq viil
[toimõndaq | toimõndaq lätteteksti]Kirändüs
[toimõndaq | toimõndaq lätteteksti]- Hirvlaanõ Milvi, "Põlva Ühisgümnaasium ajast aega", 2005.
- Pintsaarõ Asta, "David Donneri sünnist möödub 200 aastat", "Koit", 16.12.2010.