Podekrati Ülle
Podekrati Ülle (Ülle Podekrat; sündünüq 16. joulukuu pääväl 1958; koolnuq 12. põimukuu pääväl 2016) oll' eesti rahvakultuuri edendäjä ja muusigaoppaja. Tä oll' Lõuna-Eesti latsiaidu folklooripidodõ ja üle-eestilidse latsiaialatsi rahvamängõ festivaali “Kes aias?” iistvõtja ja pääkõrraldaja. 1988. aastagal asot' tä folkloorirühmä Käokiräs. Tä oll' Eesti rahvamuusigatüütlüisi festivali “Moisekatsi Elohelü” – Moosten peetävä eesti rahvamuusigatüütlüisi festivali (täämbädsel pääväl Mooste Elohelü) idee autor ja 17 aastat tuu pääkõrraldaja.
Elokäük[toimõndaq | toimõndaq lätteteksti]
Podekrati Ülle (sündünü nimega Tolmik) kasvi üles Pärnomaal Sindin[1], a timä edevanõmba elliq Setomaal Töganitsa külän. 1974–1978 oppõ Ülle Tarto Pedagoogilidsõn Koolin latsiaia muusigakasvataja ja kuulõ muusigaoppaja erialal. 1978. aastak oll' tä hindä elon tähtsä aastak, selle et Ülle läts' mehele ja sündü tütär Maris. Kats aastat ildampa sündü poig Targo. Ku tä kooli lõpõt', saadõti tä üten uma abikaasaga tüüle Alaverre Harju maakunnan, a mõni aastak ildampa koliti mehe kodokanti Vahtsõ-Kuustõhe[2], kon tä elli terve ülejäänü elo. Podekrati Ülle matõti 17. põimukuu pääväl 2016 Setomaalõ Laossina kalmuaida.
Tüüq ja tegemiseq[toimõndaq | toimõndaq lätteteksti]
1982. aastagal läts' Podekrati Ülle muusigaoppajas tüüle Põlva latsiaida Mesimumm. Ülle pand' latsi oppamisõ man väega pall'o rõhku perimüsele. Tä pidi tähtsäs opadaq latsiaian regilaulu ja hoitaq Põlva kandi perimüskultuuri. Tekkü mõtõq tetäq latsi folklooripido “Pedäjä Pido”, miä oll' edimäst kõrda 1988. aastagal ja mink tsihis oll' keele ja kultuuri ni vannu eesti rahvamängõ tutvastegemine algharidusõn[3][4].
“Pedäjä Pido” kasvi ja 2000. aastagast sai Üllest Lõuna-Eesti latsiaidu folklooripidodõ ja üle-eestilidse latsiaidu rahvamängõ festivali “Kes aias?” alostaja ja pääkõrraldaja.[5][6]
1988. aastagal asot' Ülle Põlva latsiaian Mesimumm folkloorirühmä Käokiräs. Ildampa tulli latsiaialatsilõ mano ka tütärlatsõ ja suurõ inemise.[7] Rühmä tsiht oll' ja om Põlva kihlkunna vaimlidsõ kultuuriperändüse hoitminõ ja tutvastegemine. 2007. aastagal anti vällä vanno laulõ DVD.[8]
Podekrati Ülle oll' 1999. aastagal Põlvan algusõ saanu Põlva Folkfesti käümätoukaja. Tuust ettevõtmisõst kasvi vällä “Moisekatsi Elohelü” festival. Podekrati Ülle suur roll om ka tuun, et Moosten om parhillaq Folgikoda ja Mooste Rahvamuusigakuul.[9]
Kittüseq ja avvuhinnaq[toimõndaq | toimõndaq lätteteksti]
- 2000 Hurda Jakobi rahvuskultuuri avvohind
- 2005 Eesti Kultuurkapitali rahvakultuuri tsihtkapitali aastapreemiä (perimüspõhidsõ muusigaoppusõ süstemi luuminõ ja folklooripitõ kõrraldaminõ)
- 2006 Valgõtähe V klassi tiinidemärk
- 2007 Perimüskultuuri avvohind
- 2013 Põlvamaa aasta kultuuripreemiä
- 2014 Põlvamaa vapimärk
Lätteq[toimõndaq | toimõndaq lätteteksti]
- ↑ Moisekatsi Elohelü: Ülle Podekrat
- ↑ Moisekatsi Elohelü: Ülle Podekrat
- ↑ Lasteaed: Eesti lasteaiaõpetajate ajakiri. 15.09.2008. V Eesti Rahvamängude Festival “Kes aias 2008” Põlvas.
- ↑ Lasteaed: Eesti lasteaiaõpetajate ajakiri. 20.05.2008. Lasteaiad väärtustavad pärimuskultuuri.
- ↑ Koit. 16.08.2016. In memorian. Ülle Podekrat.
- ↑ Maaleht. 22.05.2012. Mudilased üle Eesti laulavad Põlva pühadele puudele.
- ↑ Eesti Rahvakultuuri keskus: Vana-Võromaa rahvalaul.
- ↑ Eesti Rahvakultuuri keskus: Vana-Võromaa rahvalaul.
- ↑ Koit. 16.08.2016. In memorian. Ülle Podekrat.