Kalkuni Mari

Kalkuni Mari 2017. aastagal

Kalkuni Mari festivalil "Weltmusik" Detmoldin Saksamaal, 2021

Kalkuni Mari vai Kalkuna Mari (Mari Kalkun, sündünüq 1. mahlakuu pääväl 1986) om võro ja eesti laulja, laulukirotaja, viiemeistre ja muusik.

Haridus

Kalkuni Mari oppõ 2005–2009 Tarto Ülikooli Viländi Kultuuriakadeemiän kultuurikõrraldust ja süvembähe tuu muusiga jako. Lõpõt' 2013. aastagal Eesti Muusiga- ja Tiatriakadeemiä ni Tarto Ülikooli Viländi Kultuuriakadeemiä ütismagistriopikava perimüsmuusiga laulu ala cum laude. Aastil 2012–2013 oppõ tä vaihtusüliõpilasõn Sibeliusõ Akadeemiä perimüsmuusiga osakunnan laulu alal, kon tekk' ka magistrikontsõrdi.

Luudu ja tegemiseq

Kalkuni Mari miildejääjäq viieq ja ruumilidsõq helümaastiguq ommaq mõotõduq eesti luulõst ja luudusõst, leelost ja elost hindäst. Tä pruuk muusiga luumisõ man kandlit, akordionni, kitrat, klavõrit, a innekõgõ tund timmä ärq timä vägevä ja var'onduisirikka helü perrä. Tähtsä kotus timä luudun om improvisatsioonil ja hellega katsõtamisõl.

Kalkuni Maril om ilmunuq mitmit albommõ, minkast osa ommaq vällä antuq ka muial Euruupan ja Jaapanin. Timä muusigutii naas' pääle autorialbomiga ”Üü tulõk” (2007), miä võeti kodomaal lämmähe vasta ni midä panti tähele ka välämaal. Kalkuni Mari lõi 2012. aastagal Helsingin uma riikevaihõlidsõ ansambli nimega Mari Kalkun & Runorun. Ansambli albom "Tii ilo" panti muusigaavvohindohindo kandidaadis nii Eestin ku Soomõn.

Mari om ummi kontsõrtõga üles astnuq inämbüsen Euruupa riigen, New Yorgin ja Washingtonin ni käünüq kuvvõl ringreisil Jaapanin. 2018. aastagal valiti timä sooloalbom “Ilmamõtsan” album The Guardiani puult aastaga kõgõ parõmbidõ maailmamuusiga albommõ egimäste kümnehe.

Mari om tennüq ütistüüd Klassigaraadiolõ ja BBC-le. Tä om olnuq osalinõ riikevaihõliidsin muusigaprojekten, näütüses solist Läti rahvusligu sümfooniaorkestri ni Läti riigi kooriga Latvija ni Eesti Filharmoonia Kammõrkooriga muusigalavastusõn "Suidsusannasümfoonia". Tä om tennüq kuustüüd sääntside kuulsidõ maailmamuusikidõga nigu Thomsoni Nathan Riki, Kauhaneni Maija, Kivimäki Anne-Mari, Käppi Pekko, saami räppär Valle Ailu, tõva muusik Mongguši Andrei, Nakai Tomoya jt. Mari muusikat om säet ka koorõlõ ja orkõstriilõ ni lault nii mitmõl võrokiilsel laulupidol Umal Pidol ku Eesti nuuri tandsu- ja laulupidol.

2009. aastagast om Kalkuni Mari vabakutsõlinõ muusik. Inne tuud om tä tüütänüq Klassigaraadion ja Eesti Perimüsmuusiga Keskusõn. Tal om uma plaadifirma Haki Helü.

Albomiq

• "Üü tulõk" (Õunaviks, 2007)
• "Vihmakõnõ" (Õunaviks, 2010)
• "Upa-upa ubinakõnõ" (Võro Instituut, 2015)
• "Tii ilo" (Rockadillo Records, 2015)
• "Ilmamõtsan" (Nordic Notes, 2017)
• "Õunaaia album" (Aigu Om Records, 2020)
• "Stoonia Lood" (Real World Records, 2023)

Singliq

• "Sata-sata!" (2019)
• "Ma tahaksin kodus olla" (Aigu Om Records, 2020)
• "Elukoor" (Aigu Om Records, 2020)

Kittüseq

• 2010 Tarto Kultuurikandja avvonimitüs (nuur kultuurikandja)
• 2013 Etnokulp (kõgõ parõmn laulja)
• 2016 Eesti Kultuurkapitali Võromaa eksperdigrupi aastagaavvohind võrokiilside latsilaulõ popularisiirmise iist (üten Bartosiki Tuulikki ja Tedre Ramoga projektin "Upa-upa ubinakõnõ")
• 2018 Tallinn Music Weeki artistiauvvohind
• 2018 Võromaa kultuuripärl – Võromaa kultuurisaadik maailman
• 2018 stipendium "Ela ja sära"
• 2019 Eesti Kultuurkapitali helükunsti tsihtkapitali aastagapreemia (sisutihtsä luumisaastak)
• 2020 Aastaga muusik

Välälingiq

• Ammõtlinõ kodoleht
• Eesti Ansamblidõ Andmõbaas
• Kalkuni Mari videoq Vimeo.com saidi pääl
• Kalkuni Mari & band
• Kalkuni Mari: folgin tulõ löüdäq uma kiiks. Eesti Päevaleht, 2. aprill 2011