Hiiobi Otto

Hiiobi Otto (Ott(o) Hiiop; 29 (17).12.1865 – 12.02.1950) oll’ Urvastõ kihlkunna viiulimängjä.

Elokäük

Hiiobi Otto sündünüq 29. (vana kallendri perrä 17.) detsembrikuu pääväl 1865 Helme kihlkunna Patkülä valla Talva talon, a elli eloaig Urvastõn. Tõsõq kutsiq tedä mitmõ nime perrä: lihtsähe Otto, Talva Otto, kutsuti kah „mulgis“. Käve säidse talvõ Vaabina vallakoolin. Pidi päämädselt põllomehe ammõtit, a umma põldu oll' vähä: ynnõ katõssa hektäri (25 vakamaad). Olnuq ka tulõkassa president, kümnik, ja vallavolimiis.

Hiiobi Otto veli mänge kah viiulit, ni ka lellä- ja tsõdsõpujaq olnuq viiuldajaq. Kar’atsuran sõs kui oll 11-aastanõ, meisterd' edimädse viiuli karmaniväidsegä haavapuust. Sai määntsegi viiuli muudu mässätüse valmis ni õkvalt nakas' mängo opma. 16-aastadsõlt mänge tä joq ostõdu viiuli pääl ja oll' tundsa saajopillimiis.

Ildampa, kuq Hiiobi Otto Tartun käve, opsõ tan tõist viiulit mängmä ja opas' tuud umalõ paarilisõlõ, Joakiti Kristjanilõ, kinkaq mängseväq ütenkuun inne edimäst ilmatapõlust. Viil juhtõ tä umasäetüt kuuri, kon oll' kuun kuus miist, kiä mängseväq lyytspilli ja viiuliid. Esiq mänge tä kokko kandlõ, duurkandlõ ja klavõriga.

Tampere Herbert tähend’ 1936. aastal timält üles 100 luguhust. Pulsti August võtsõ timält üles 5.-6. lehekuu pääväl 1937. aastal pääliinan 14 luguhust:

1. Labajala valts
2. Rida Juku – eritants
3. Savikoja venelane – eritants
4. Üits taht immä
5. Nummerpolka
6. Eesti kassatsk
7. Kolmepaari tants – eritants
8. Ma lõõri niiku lõoke – polka
9. Tütärlatsõ linnukesõ – polka
10. Mäe otsas Tuule talos – eritants
11. Oles mul üits naisenäru
12. Oh, sina vigur viinakene
13. Pill-pomm, pill-pomm Pikku Vassa – polka
14. Sikusarve lugu

Lätteq

A. Pulst Mälestusi muusika alalt, ETM fond nr. M 231:1, Säilitusühik nr. 23
ERA, Foto 530, fotograaf P. Parikas
Varblane, Marju. 2007. Urvaste viiuldajad Otto Hiiop ja Kristjan Joakit ning nende repertuaar" Seminaritöö. Tartu Ülikooli Viljandi Kultuuriakadeemia

Välislingiq