Wastne Testament

„Wastne Testament“ (WT) om edimäne tävveste lõunaeesti keelen kirja pant raamat. Teos ilmu 1686. aastagal Riian. Piibli ümbrepandjit oll' kats': esä ja poig, Andreas Virginus (1640–1701) ni Adrian Virginius noorõmb (1663–1706).

WT tõõnõ trükk ilmu 1727. aastagal ja kolmas 1815. aastagal. 1857. aastagasaa trüküst pääle ommaq mano võeduq ka „Vana Testamendi“ psalmiq. Illatsõmbaq trüküq parandasõq päämidselt õigõtkirjä. Perämäne WT välläannõq ilmu 1905. aastagal. Ildampa (1926) ilmu setokiilne „Mii' Issändä Jeesusõ Kristusõ pühä Evangeelium: Matteusõ, Markusõ, Luukasõ ja Johannõsõ kirotõt“.

19. aastagasaal oll' WT köüdet ka katõ kiräkeele võigõlusõga. Rannu kogohusõ opõtaja Wilhelm Friedrich Steingrüber (1761–1834) om kõrvuisi säädnüq kolmõ WT ja „Uue Testamendi“ välläandõ kiilt ja om märknüq tarto keele parõmbust. Tä tuu vällä, et lõunaeesti tekstin om 1) alalõ tüvisõnno, näütüses awwa, weer, penni, hapne, pallama, perrandama; 2) sõnno, miä ommaq kokkohoitligumbaq, näütüses sallaus (tln salla assi), rasse (käuma peäl), tuggi (allune järg), haarma (kinni hakkama), umbusk (uskmatta südda); 3) alal ummi sõnno, näütüses hirs (tln palk), könnelema (räkima), wannik (kroon), pord, pordik (hoor), aidnik (kärner).