Viilavvasport

Viilavvasport om viispordiala, kon viilavvasõitja sõit esiqerälidse lavva – viilavva pääl, midä veetäs moodorloodsigu vai kaabligaq. Viilavvasport köüt viisuusa, lumõlavva ja surfi elemendiq.

Varustus

Viilavvasõitmisõs om vaia:

• Viilaud: Lavvaq ommaq tettüq mitmõsugutsist matõrjaalõst. Inämbüisi ommaq lavvaq seest puust vai vatust, miä om katõt klaasplasti vai süsinikkivvugaq. Lavvaq või jakaq katõs – kaablilavvaq ja loodsigulavvaq. Kaablilavvaq ommaq sagõhõhe pehmembäq ja ilma hormõldaq. Loodsigulavvaq ommaq kõvõmbaq ja üten hormõgaq.
• Saapaq: Saapaq ommaq lavva külge pantuq, et lauda parõmbahe juhtiq.
• Pästevest/lüükvest: Viilauda saa sõitaq ka ilma pästevestildäq/lüükvestildäq, a taa om tähtsä julgõstus, miä avitas vette satõn vii pääl püssüq. Lüükvest om sakõstõ mugavamb ja ohkumb ku pästevest.
• Kiivri: Loodsigu takan sõitõn om kiivril veidemb tähtsüst, selle et om veidemb kotussit, kohe pääd ärq lüvväq. A kaablipargin või ollaq pall'o hüppit ja torrõ, kohe om suur oht uma pää ärq lüvväq. Tuuperäst om kaablipargin kiivri pruukminõ kohustuslik.
• Tõmbamissüstem: loodsik vai trossisüstem miä sõitjat edesi tõmbas.

Sõidutehnigaq ja viguriq

Viilavvaspordin om pall'o mitmõsugutsit teknikit ja vigurit, midä sõitja saa tetäq. näütüses hüppämiseq, käändmiseq ja muuq akrobaatlidsõq trikiq. Viguriq võivaq sakõstõ ollaq lumõlavvaviguridõ muudu, kuiki ommaq inämbüisi nimitedüq tõistmuudu.

Võistlusõq

Viilavvasport kuulus mitmõ rahvusvaihõlidsõ võistlusõ ja meistrivõistluisi kavva. Kõgõ tuntumbaq noist ommaq Wakeboarding World Championships ja X Games. Võistluisil hinnatas sõitja teknilist mõistmist, stiili ja tettüisi viguridõ rasõhust. Ka Eestin peetäs egä suvi Eesti meistrivõistluisi viilavvaspordin.

Esiqsugudsõq kaablisüstemiq

Tunnõtumbaq kaablisüstemiq ommaq tsõõrikkaabli- ja katõ punkti kaablisüstem. Katõ kotussõga kaablisüstemi kutsutas ka 2.0, selle et om kats torni, mink pääl kaabli sõit. Tsõõrikkaabli pääl saa sõitaq mugavahe ja ilma ümbre käändmäldä, ja mitu inemist kõrraga. A katõ torni süstemin sõit hariligult üts inemine kõrraga ja piät sõitmisõ aigu kõik aig ümbre käändmä. Eestin toimõndas ka kaablisüstemme ja viihüppetorrõ tegijä Wakestation

Eesti viilavvapargiq

MTÜ Eesti Wake andmidõ perrä oll' 2023. aastagal Eestin kümme viilavvaparki. Täämbädses (2025) om noist üts legendaarsõmbit ja Eesti edimäidsi, Rahinge wakepark, kinniq pant. A hää uudis om tuu, et üts vahtsõmbit eesti tsõõrikkaablit om Võromaal, Põlva liinan. Nii et kinkal huvvi tuu jaos, las lätt ja kaes perrä.

Eesti viilavvapargiq MTÜ Eesti Wake andmidõ perrä (2023)

• Rahinge Wakepark
• Otepää Wakepark
• NOCCO Männiku Wakepark
• Alesti Puhkekeskus
• Väätsa Tervisekompleks
• Pidula Wakepark
• Metsjärve Puhkekeskus
• Wpark (tsõõrikkaabli)
• Põlva Wakepark (tsõõrikkaabli)
• Aidu Veemaa