Roho Richard
Roho Richard (Richard Roht; sündünüq 12. mahlakuu pääväl 1891 Karaski külän; koolnuq 22. põimukuu pääväl 1950) oll' kiränik.
Elokäük
[toimõndaq | toimõndaq lätteteksti]Kirämiis Roho Richard kirot' kodost ja kodokandi inemiisist uman raamatun "Vana Võromaa". Tä sündü Kõllõstõ valla Karaski külä Tinno talon. Oll' kõgõst kuvvõaastaganõ, ku imä Ann kuuli. Esägaq es saaq tä peris häste läbi. Esä, esiq küländ suurõ talo perremiis, oll' kidsi. Opmisõs anti kotost veidüq tukõ. Timä koolitii käve Karaski küläkoolist Kanepi kihlkunnakuuli, säält Võro liinakuuli ja Tarto Treffneri gümnaasiummi. Keerolidsõq aoq veiq noorõ mehe esikiq sõtta. Elotii vidi mitmõlõ poolõ: tä elli Tarton, Peterburin, Helsingin, peränpoolõ viil Berliinin ja Talinan. Mõnõ ao pidi tä Sangastõn tallo.
Timä veli Roho Gustav oll' trükü- ja raamaduköütmisettevõttõ umanik Tarton; sõsarapoig Uibopuu Valev oll' kah kiränik.
Luum
[toimõndaq | toimõndaq lätteteksti]Roht kirot' suvitusromaanõ, juttõ liina- ni küläelost ja mälestüisi. Timäst sai parõmbit vana Võromaa elo ja inemiisi tundjit – tuust kõnõlõsõq raamaduq "Kurgsoo", "Maa" ja "Elutee". Hääs sõbras olliq tälle järveq ja mõtsaq. Latsilõ kirot' kirämiis põnõvit ja süämest tulnuid juttõ pinne ja mõtsaeläjide elost: "Väleküüs ja Tuhknai", "Laaned ja veed", "Lapsed, linnud ja loomad".
Seon artiklin om tarvitõt teosõ "Võromaa kodolugu" matõrjaalõ.