Lindsaarõ Piitre

Lindsaarõ Piitre (Peeter Lindsaar, sündünüq 29. piimäkuu pääväl 1906 Kuldrin; koolnuq 6. märtekuu pääväl 1990 Sydneyn) oll' eesti kirämiis ja sõaväeläne.

Kirämiis Lindsaarõ Piitre sündü Vahtsõ-Antsla valla Kuldri külä Hansi talon. Esä oll' täl vallavanõmb. Lugõma nakas' poiss säitsme-aastadsõlt. Kuuli minnen sai timäst kõrragaq raamadukogo lugõja.Opsõ Vastse-Antsla vallakoolin 1915-1917, Otepää progümnaasiumin 1917-1922, Valga poiglatsi gümnaasiumin 1922-1927, Tartu ülikooli filosoofiatiidüskonnan 1937-1938 ja õigustiidüskonnan 1938-41. Tä tekk' kooli aokirja. Jo sis arvanuq üts kuulmeistre, et noorõst Lindsaarõst saa kimmähe kiränik vai aokiränik.

Korporatsioon Ugala liigõq aastast 1935. Pikält sai nuur kirämiis sõamehe põlvõ pitäq. 1931 lõpõt' Tondil sõakooli. Eesti kaitsõväen anti tälle Kotkaristi märk abi iist Petseri liina tulõkah'o kistutamisõl. Sõatiid nakas' tä käümä Verevän väen, sis läts üle s'akslaisi poolõ pääle ja pagõsi S'aksamaalõ. Tä jäi sõavangi. Ildamba elli Austraalian Sydney liinan. Umaq raamaduq peränd' tä Võromaa raamadukogolõ.

Kirämiis Lindsaarõ Piitre läts kodomaalt kõgõ kavvõmbahe, a raamatin "Vana hobune" ja "Koduküla" ommaq kodokandi kotusõq, küläq, inemiseq ja eläjägiq alalõ. "Vana hobune" om edimäne eestikeeline raamat, miä Austraalian vällä anti.

Süä kisk' tedä õks kodokanti. "Jäi Urvastõ uma oro ja murrõgaq, miä om niisama vana ku laul ja inemiseq," om tä esiq kirotanuq.