Gutslaffi Johann

Gutslaffi Johann (Johann Gutslaff, ?–1657) oll' baltis'aksa opõtaja ja kirämiis'.

Tä sündü Hummogu-Pommerin Daberin (põraaignõ Poola liin Dobra) ja kuuli 11. urbõkuud 1657 Talliinan.

Gutslaff om olnuq üliopilanõ Greifswaldi, Leipzigi ni Tarto ülikoolin. 1641. aastagast pääle tüüt' tä Urvastõn opõtajan.

1644. aastagal and' Gutslaff vällä raamadu „Kurtzer Bericht und Unterricht Von der Falsch-heilig genandten Bäche in Lieffland Wöhhanda“ („Lühkü teedüs ja oppus võlssi pühäs peet Võhandu jõõst Liivimaal“), kon om seen ka piksepalvõ üleskirotus.

Gutslaffi sulõst tull' 1648. aastagal vällä edimäne lõunaeesti keele grammatiga „Observationes grammaticae circa linguam Esthonicam“. Gutslaff nakas' ka heebreä keelest Vana Testamenti ümbre pandma, a tuu tüü jäi poole pääle.